عاوز تعرف أحنا مين؟!
عاوز تعرف أحنا مين
أحنا ضحكة ملايكة موجوعين
منا كتير في طنطا وشبرا والبساتين
إحنا لامؤاخذة عاملين عايشين
بنكدب حتي ع الموت
شبهنا كتير تلاقهم جنبك ماشين
اللي بشخليله وكوز
ومنا نجيب محفوظ
ومنا كام أراجوز
ومنا كداب الزفه بعشوه
برغيف رز ولحمه
ومنا ابو حلفان كداب
إتفضل الغدا جاهز
وهو يدوب فطرته يوم الجمعه شكك علي عربيةفول
إحنا سرداب
تصدق حلو عذاب
الجوع الطاهر
إحنا صاحبنا الظاهر
وطومان باي
غلبنا الصبر قال جاي
مفيناش ليه وازي
بعمانا راصدين حتي خيالك
قول فينا مابدالك
إحنا جرابيع
فقرا لكن اقرا
مفيناش حد يبيع شبر
مهما إتكاتروا علينا خلايجة آخر وقت
قبل الطوفه
منا ألاضيش بالذوفه
صحيح لكن عدينا بارليف
ريحنا خفيف كما طيف رباني مايتشاف
وصفه عجيه بلا أوصاف
شعبنا خواف
غصبن عنه شاف شياطين الأرض بتهد عليه المرقد
بتعد في حلقه اللقمه من جلده إتاوه ع الهدمه
مجلود ع الكلمه
منداس في اللمه
لكنه بيفتح ويشوف في الضلمه
يصبر ويصاحب حتي الغمه
تلقاها جنبه بتشرب شاي ف ميدان القلعه
عنده كنوز متعلقه ع الحيطه
صورة عبدالناصر والسدالعالي
صورة للست الكوكب سومه ومحمد قنديل
علبه كرامله قديمه تحت الكنبه فيها شهادة أكتوبر
مختومة بختم الجمسي
ونيشان الشاذلي حامي النيل
إحنا كما عنقود مادد عادد حاسب ميات النهر كوز كوز
واللي ضارب بوز وقلبه حليب صابح سارح علي خمسه جنيه
تلاقينا بتأمل وبصبر عجيب نطفح أرزل خلق الله
مشنة بعنا مقسومه ثلاثة المخبر تلث والتلتين صدقه وأكل عيال
الواحد منا حاوي
يوم يدفع قسط جواز البت
ويوم يدفع باقة النت
ويوم يدفع للست….
دوا الحاجه السكر والقلب
والله ماتعرف كيف بنزق الأيام السوده
خمسه ف أوضه وماشين ع الموضه
بتلفون تتش
صيني ماشي ميضرش
لماتعدي التشريفه يلمونا كما كوم قش
لا يهمه يوقع ضحكه من خدي ويعدي
يدهس عربية تين أو طشت المش
بالصدفه عرفان بينادي عجينة طعميه بجنيه ونص
اقفل شبابك بابن الوسخه هوس
يدخل يتخبي وسط عياله يبكي ويرسم بسمه بهمس
عزقه آخر نوبه كسرت ضلعين
وصابعه مدوحس مدهون كبريت
إحنا أحفاد أيوب
صبرنا لغز
حيرنا الغز
جيش ورا جيش يطلع مهزوم
تعرف إحنا أسرنا مدفع نابليون
لما هرب من مصر
فضل المدفع مدفون ف باب الخلق
لما خورشيد رفض العزل
النبوت دق ؟
قلب بهيه حن ورق
يدخل روحنا يطلع صهد
وف لحظة يجيب الوعد ؟
سيد الخمار
شاعر وصحفي مصري
